SH Xasan Daahir Aweys oo 3dii maalmood ee u danbeeyey ay wadahadallo isdaba joog ah magaalada Cadaado kula yeelanayeen wafti ka socday dowladda Soomaaliya oo gaaray Cadaado,wufuud ka yimi magaalooyinka Guriceel, Dhuusamareeb iyo masuuliyiinta maamulka Ximan iyo xeeb ayaa kusoo dhammaaday in SH Xasan Daahir Aweys lagu qanciyo inuu Muqdisho yimaado.
Diyaarad gaar ah oo galabta Gabbal dhicii magaalada Cadaado ka soo qaadday SH Xasan Daahir Aweys ayaa daqiiqado ka hor kasoo dagtay garoonka diyaaradaha magaalada Muqdisho, SH Xasan ayaa waxaa la socda madaxweynaha maamulka Ximan iyo Xeeb,waftigii ka socday dowladda ee Cadaado gaaray masuuliyiin kasoo raacay gobolada dhexe iyo 20 askari oo ka tirsan ciidanka maamulka Ximan iyo xeeb oo loogu tala galay sugidda amniga Waftiga,SH Xasan iyo masuuliyiinta maalmihii danbe la shirsanaa ayaa la sheegayaa iney gaareen heshiis afka ah oo aan ilaa hadda la qeexin waxa uu ka kooban yahay.
SH Xasan Daahir Aweys ayaa maalmahan oo idil ka dhega adaygayey talooyinka waftiga Cadaado gaaray ee ku saabsanaa inuu waftiga Muqdisho usoo raacay iskuna dhiibo dowladda federaalka Soomaaliya.
Amniga garoonka diyaaradaha ayaa waxaa Caawa la wareegay ciidamada gaarka ah ee nabad sugidda ee loo yaqaano Gaashaan kuwaas oo gabi ahaanba Ciidankii garoonka hore u joogay kala wareegay sugidda amniga,Wariyaasha ayaa loo diiday iney gudaha u galaan garoonka,masuuliyiinta garoonka ayaa sheegay inaan saxaafadda loo ogoleen iney wax sawir ah ka qaataan SH Xasan Daahir.
Waxaana lagu wadaa in dowladda Soomaaliya ay si faah faahsan uga hadasho saacadaha soo socda arinta SH Xasan Daahir Aweys iyo imaanshihiisa magaalada Muqdisho oo ay ugu danbeysay muddo dhowr sano ah.
No comments:
Post a Comment