Gud. Ciro |
Hargeysa –
Gudoomiyaha golaha wakiilada Somaliland, isla markaana ah gudoomiyaha xisbiga
mucaaridka ah ee Wadani Cabdiraxmaan Maxamed Cabdillaahi (Cirro) ayaa la
sheegay inuu awoodiisii iskugu geeyay sidii xildhibaan Ibraahim jaamac Cali
Rayte oo ka mid ah xildhibaanada laga soo doortay xisbiga Kulmiye ee ku soo
biiray Wadani loogu dooran lahaa gudoomiyaha guddiga arrimaha gudaha iyo
nabadgalyada ee golaha wakiilada oo hogaankiisa loolan loogu jiro.
Gudoomiye Cabdiraxmaan Cirro oo dhawaan isku shaandhayn
ku sameeyay siddeeda guddi hoosaad ee golahasi, ayaa xubnaha guddiga arrimaha
gudaha oo ka kooban sagaal xubnood shan xubnood oo ka mid ah ka dhigay xubnaha
xisbigiisa wadani, kaas oo loo saadaalinayo jagada gudoonka arrimaha gudaha in
loo doorto xildhibaan Rayte oo la sheegay inuu haysto kalsoonida shan xubnood
oo ka mid ah guddigaasi.
Dhinaca kale loolanka adag ee ka aloosan hogaanka guddi
hoosaadyada kale ee golahaasi oo ay ku tartamayeen xubnaha xisbiga Kulmiye ee
muxaafidka iyo xubnaha xisbiga Wadani ee mucaaridka ah, ayaa ilaa hada waxa ka
mid ah guddiyada gudoomiyayaahooda lagu kala calaf qaaday, gudoomiyaha guddiga
dhaqaalaha, ayaa si rasmiya loogu doortay xildhibaan Cumar Axmed Saleebaan
Sanweyne oo ka mid ah xildhibaanada Kulmiye laga soo doortay, halka xoghayahana
loo doortay xildhibaan C/qaadir Askar oo ka soo jeeda xisbiga Wadani.
Gudoomiyaha guddiga joogtada ayaa isagana loo doortay
xildhibaan Ibraahim Mahdi Buubaa oo ka soo jeeda Wadani, halka xoghayaha
guddigaasina loo doortay xildhibaan Axmed Ducaale Bulaale.
Gudoomiyaha guddiga arrimaha bulshada ayaa isagana la
sheegay in loo doortay xildhibaan Xasan Cawaale Caynaan oo ka mid ah xubnihii
laga soo doortay xisbigii Udub ee saaxada siyaasada ka dhacay ee ku biiray
Kulmiye, halka guddiga la dagaalanka musuqmaasuqa iyo ilaalinta hantida
qaranka la sheegay in gudoomiye loogu doortay xidhibaan Maxamed Cali Xirsi oo
ka mid ah xubnaha xisbiga Kulmiye laga soo doortay ee lagu tilmaamo mucaaridka.
Dhanka kale guddiyada arrimaha dibada, khayraadka iyo
shuruucda ayaan ilaa hada iyagana xubnaha guddigaasi aanay dooranin
hogaanadoodii.
Gudoomiye Cabdiraxmaan Cirro iyo xisbigiisa wadani ayaa
ilaa hada Kulmiye kaga guulaystay hogaanada guddiga arrimaha gudaha iyo
joogtada, kuwaas oo ka mid ah guddiyada bartilmaameedka u ahaa gudoomiye Cirro
xilligii uu isku shaandhaynta ku sameeyay guddi hoosaadyada golahaasi.
No comments:
Post a Comment