Madaxweyne Siilaanyo Oo Cafis Ku Sii Daayay Haweenaydii U Xidhnayd Farriimo Cay ah Mobilka Ay Uga Dirtay Wasiirka Madaxtooyada

Madaxweynaha Somaliland Md. Axmed Maxamed Siilaanyo, ayaa cafis ku sii daayay gabadh lagu magacaabo Nadra Maxamed Jaamac, oo ah haweenay ay maxkamadda gobalka Hargeysa ku xukuntay 8 bilood oo xadhig ah ka dib markii ay ku heshay dambi aflagaado madax qaran.

Nadra, oo iyadoo Hargeysa joogta xalay u warantay Wargeyska Geeska Afrika, waxay sheegtay in lagu soo daayay cafis madaxweyne, ka dib markii laga codsaday  Madaxweynaha, "Waxa la igu soo daayay cafis Madaxweyne, ka dib markii laga codsaday." ayay tidhi Nadra, oo sheegtay inay maalmaha soo socda saxaafadda la hadli doonto. Nadra, waxa shalay ay ka soo baxday xabsiga magaalada Gabiley.

Haweenaydan ayaa wuxuu xadhigeedu abuuray dareeno xaasaasi ah, ururada xuquuqda aadamaha oo horaantii taageero u fidiyay gabadhan ayaa sheegay cadaymo hor leh oo ay heleen awgood kuwaasi oo daboolka ka fayday fariimaha ay dirtay Nadra in ay ahaayeen cay laf jab ah oo dhaqanka, diinta iyo xuquuqda aadamaha gef ku ah sidaasi darteed ay gabi ahaanba kala noqday taageeradii ay siinayeen gabadhan.

Maxkamadu Gobolka oo dhagaysatay dacwada lidka ku ah Nadra oo ay Xeer Ilaalinta Qaranku soo oogtay, ayaa ku xukuntay Nadra Maxamed Jaamac 8 bilood oo xadhig ah, iyadoo dhawr bilood haatan dhamaysatay xadhigaasi.