Thursday, December 27, 2012

MAANSO CUSUB OO UU U TIRIYAY ABWAAN WEEDHSAME MADAXWAYNE SIILAANYO IYO XUKUUMADIISA





1.               Muusoow habeenadan

2.               Hawraartii maansada

3.               Baal maray hoggeedii

4.               Gees dhigay hubkeedii

5.               Balse hooto maan noqon

6.               Mana dhiman hankaygii

7.               Mana dhimin hadhuubkii

8.               Run u hiilintaydii

9.               Weli waa halkeedii

10.             Habrashana warkeed daa.

11.             Heemaalka jiiftada

12.             Qaar iga horreeyoo

13.             Hibo lagu mannaystaa

14.             Heemiyey duxdeedoo

15.             Waa huubaheedii

16.             Waxan heelka soo dhigay.

17.             Marka Xumo la huursado

18.             Samuhuna habeensado

19.             Garashada hog loo qodo

20.             Hinqashada dharaaruhu

21.             Saban-aakhir heegmaan

22.             Wuxu yidhi hanuun-same

23.             Nebigii habboonaa

24.             Himilada dad leeyahay

25.             Duul baa u soo hadha

26.             Hawadoodu beeniyo

27.             Damaciyo hunguri tahay.

28.             Hilinkay ku seegaan

29.             Harawsiga is-moodsiis

30.             Dadna way halleeyaan.

31.             Dad ma kala hambaystaha

32.             Danta uma hagoogtaha

33.             Maatada habaaskiyo

34.             Halasuhu ku yuururo

35.             Iyagoo habeen qada

36.             Codka ii hibeeyiyo

37.             La dhex tegay hinaasuhu

38.             Ma hoggaamiyuu noqon.

39.             Hadda heeryadii cune

40.             Hafar baad ku nooshee

41.             Hiilkiyo kalsoonida

42.             Hanashadu ka xeel dheer.

43.             Summadaha hoggaamiye

44.             Lagu hayb-yaqaanaa

45.             Waa hayal samaantiyo

46.             Kibir laga hayaamiyo

47.             Huwashada xaqiiqdiyo

48.             Habka dhaqan addoonimo

49.             Hogashada ilaah-garad

50.             Dadka kiisa hodanka ah

51.             Iyo hebelka caydha ah

52.             Ama kiisa hanadka ah

53.             Iyo sooma-hoydaha

54.             Hedda uuni sudhan tahay

55.             Waa hadhac ay eegtaan

56.             Ku darsoo hadhkiisana

57.             Hormo gaara baan degin.

58.             Huga suudh nin qaatiyo

59.             Inta shaalka haysuun

60.             Hadda hadalka kama guro.

61.             Inta haylo duugiyo

62.             Calal hoolmay sidatiyo

63.             Danyaraha hal soo biday

64.             Hadda heegan kuma diro

65.             Ka hiroo u diidoo

66.             Kadinkiisa ku hadida.

67.             Kaba-qaadku heestiyo

68.             Haaheeyda kuma sabo

69.             Dadka oo harraad qaba

70.             Sicir-bararna heemiyey

71.             Guul-wade habaabshaa

72.             Hoostiisa kama tumo

73.             Heelada barwaaqda.

74.             Heer baa la gaadhaa

75.             Hayb-haybta reerkiyo

76.             Hindisaha qabiilkaba

77.             Hanku kaaga dhaartoo

78.             Himilada dan guudiyo

79.             Dadka horumarkiisiyo

80.             Hilin toosan raaciyo

81.             Ifku waa habeenee

82.             Hal-hays fiican reebuun

83.             Halgankuba u kaa yahay.

84.             Heer baa la gaadhaa

85.             La dagaha habaabiyo

86.             Dulmanaha la heeriyo

87.             Deganaha hungoobiyo

88.             Qatanaha hanqaarmiyo

89.             Hooyada danleydi

90.             Hiil kaa filaanooy

91.             Kugu hoodo sheegtaan.

92.             Heer baa la gaadhaa

93.             Dadku yahay hubkaagii

94.             Marna yahay hugaagii

95.             Hantidiyo naftaadii

96.             Noloshiyo halbeegii

97.             Hogoshiyo daruurtii

98.             Hadhaciyo ugbaadkii

99.             Humaag baadi-soocdii

100.        Hawo aan la,aanteed

101.        Habeen aanad barideen..

102.        Heer baaa la gaadhaa

103.        Dadku aan la haystiyo

104.        Kii haystay kala noqon

105.        Heer baa la gaadhaa

106.        Hadalkaad tidhaahdiyo

107.        Weedhaada haadiyo

108.        Shimbiruhu higgaadshaan.

109.        Heer baa la gaadhaa

110.        Hurintaad la nooshahay

111.        Kugu soo hirtaanoo

112.        Ku hareer istaagaan.

113.        Heer baa la gaadhaa

114.        Haybadiyo karaamada

115.        Rabbi kugu hagoogoo

116.        Adigoon ku hawshoon

117.        Una hoorsan baabaco

118.        Dadku kugu hadaaqaan.

119.        Heer baa la gaadhaa

120.        Hodanimo adduunyiyo

121.        Hatigaada maalmuhu

122.        Lurba aanay kugu hayn.

123.        Heer baa la gaadhaa

124.        Horalliyo xilkaa gudo

125.        Kaa yahay huraalkaa.

126.        Heer baa la gaadhaa

127.        Adigiyo hubsiimadu

128.        Isku hooyo noqotaan.

129.        Heer baa la gaadhaa

130.        Hoos ruuxa kuu dhiga

131.        Hawo tiisu noqotoo

132.        Hammigiisu kala kaco.

133.        Heer baa la gaadhaa

134.        Waayeel habsoobiyo

135.        Wiil haadka laacaa

136.        Tusmadiyo hayaankiyo

137.        Taladiyo hoggaankaba
Post a Comment