Laascanod — Maxkamadda gobolka Sool ayaa xukunno kala
duwan ku ridday shalay dad la sheegay inay ahaayeen kuwo dilal iyo dhaawacyo
geystay, kuwaas oo ay ku jireen kuwii dilay weriye Axmed Saakin oo 23-kii
October ee sannadkii hore lagu dilay magaalada Laascaanood.
Afar qof oo ka mid ah dadka la xukumay oo saddex ka mid
ah aanay joogin goobta uu xukunku ka dhacayay ayaa lagu xukumay dil toogasho
ah, halka lix eedaysane oo laba ka mid ahi ay maqan yihiinna lagu xukumay min
afar sano oo xabsi ah, kuwaasoo lagu eedeeyey inay ka mid ahaayeen urur laga
mamnuucay deegaankaas, sida uu sheegay guddoomiyaha maxkamadda gobolka Sool,
Xasan Sheekh Cumar.
Waxaa kaloo maxkamaddu ay 14-sano oo xadhig ah ku
xukuntay haweeney la sheegay inay la shaqaynaysay raga maqan, halka shan
eedaysane oo kale ay maxkamaddu sii daysay ka dib markii lagu waayay dambiyadii
lagu soo eedeeyay.
Xukunnada noocan ah ayaa ah kuwii ugu horeeyay ee lagu
qaado magaalada Laascaanood dhexdeeda, iyadoo dadkan intooda badan la
qab-qabtay laga soo billaabo 21/12/2012-kii, kaddib markii lagu toogtay
magaalada mid ka mid ah xildhibaannada golaha deegaanka oo dhaawaciisu cuslaa.
Eedeysanayaal dhaawac u geystay xildhibaan ka tirsan
golaha deegaanka Laascaanood ayaa laga qabtay mid ka mid ah, kaasoo lagu
magacaabo Cabdifataax Sulub Aadan, maxkamadduna ay ku xukuntay isaga iyo kuwa
maqan dil toogasho ah.
No comments:
Post a Comment