Warbixin Faahfaahsan Weerarkii Muqdisho ka dhacay iyo Fashilka Dowladda Soomaaliya + Sawiro

Subaxnimadii maanta goor ay saacaddu tahay 11:00 ayaa koox hubeysan oo ka tirsan al-Shabaab u suurta gashey in ay weerar qorsheysan ka fuliyaan Xarunta Gobolka Banaadir gaar ahaan qaybta Maxkamadda Gobolka oo ku taala degmada Xamar Weyne.

Ugu yaraan 20 qof ayaa dhimatay tiro intaas kabadana dhaawacyo ayaa soo gaaray, weeraro musalsal ahaa oo maanta Muqdisho ka dhacay, 16 kamid ah dadkaas ayaa la’aaminsanyahay ineey ku geeriyoodeen gudaha maxkamada gobolka banaadir, oo ay gudaha u galeen rag gaaraya 9 kuwaas oo ku labisnaa dharka ciidanka Dowladda, kuwaasoo rasaas iyo qaraxyo isugu daray dadkii gudaha ugu jiray maxkamada.

Xarunta Gobolka Banadir ayaa ka mid ah Goobaha ugu mashquulka badan Muqdisho, waxaana weerarku ku soo beegmayaa Xili laamaha garsoorka Gobolka Banaadir ay shir ku lahaayeen Xarunta la weeraray, waxaana ay saxaafadda kula hadleen isla gudaha Xarunta, kadib markii Suxufiyiintu ka dareereen halkaas ayaana weerarku qabsadey.

Taliyaha Ciidanka Maxkamadda Sare Col.Cabdullaahi Cali Geedow ayaa sheegay in weerarku bilowdey kadib markii nin ka mid ahaa kuwa weerarka fuliyey uu is qarxiyey isaga oo baaritaankii ku socdo, kadib markii xaaladdu isku yaacdey waxaa dhanka Guriga Gobolka Banaadir hal mar naga soo galay ilaa 9 nin oo ku hubeysan qoryaha loo yaqaan dabajeexyada PKM kuwaas oo xoog nagu jiirey gudahana u galay Dhismaha, sida Geedow yiri.

Kadib waxaa xigey Qarax ka dhacay dhismaha banaankiisa kaas oo ka dhashey gaari ay wateen kooxdii xooga ku gashey goobtaas, waxaana taasi horseeday in xaaladdu faraha ka sii baxdo, iyada oo banaanka hore ee xarunta ay ku sugnaayeen ciidamo ilaalo u ahaa sarakiisha gudaha ku jirey, waxaana ay isku dhar siteen kooxda al-Shabaab ee weerarka qorsheysan fulisey.

Col.Geedow ayaa sheegay in dhisamaha ay ku sugnaayeen inta badan garsoorayaashii Maxkamadda Guddoomiyaha Maxkamadda Sare Caydiid Ilka-Xanaf, Xeer Ilaaliyaha Guud, Guddoomiyaha Maxkamadda Gobolka Banaadir iyo saraakiil kale oo faro badan.

Garsoorayaal la badbaadiyey

Markii kooxda al-Shabaab ay gudaha u galneen dhismaha waxaa xafiisyada iyo guryaha qaybaha kala duwan ku cararay dadkii ku sugnaa gudaha Xarunta, Ciidanka sida gaarka ah loo tababarey ee dowladda ee loo yaqaan Alpha Unit iyo Booliska AMISOM oo saacad kadib soo gaarey goobta ayey u suurta gashey in ay soo badbaadiyaan Caydiid ilka Xanaf iyo garsoorayaal kale oo badan kuwaas oo jaranjaro loo daadiyey soo raacey.

Kooxda weerarka soo qaadey ayaan ku talo gelin in ay dib u laabtaan, waxaana weerarkaani la mid ahaa noocyada Talibaanku ka fulin jireen caasimadda Afqaanistaan ee Kabul marar badana ayey dhismayaal ku qabsadeen sidaan oo kale, Waxaa saraakiisha la dagaalameysey kooxda al-Shabaab ee qabsadey dhisamaha Maxkamadda sheegayaan in ay qarxinayeen naftrooda markii ay ka dhamaato rasaasta ay ku dirirayaan.

Ugu danbeyntii waxaa ciidanka Dowladda iyo Booliska AMISOM u suurta galay in ay dib u qabsadaan dhisamaha kadib markii 8 kamid ah raggii gudaha galay ay isqarxiyeenka halka kan kalena ciidanku toogteen, waxaana hawlgalkaasi qaatey muddo ka badan laba saac.

Qareeno caan ahaa oo ku dhintey Weerarka

Inta la ogyahay 22 qof ayaa ku dhimatey, kuwaas oo ay qaadeen gawaarida gar-gaarka deg-dega ah, waxaana ka mid ahaa laba qareen oo caan ku noqdey Kiiskii Kufsiga iyo weriye Cabdicasiis Koronto kuwaas oo la kala yiraahdo Dr. Maxamed Maxamuud Afrax iyo Dr. Cabdikariim Xassan Gorod.

Sidoo kale waxaa ku dhintey Afhayeenkii Maxkamadda Sare Mohamed Hassan Xabeeb oo ka mid ahaan jirey Shaqaalihii Radio Muqdisho.

Al-shabaab oo sheegtey weerarka

Kooxda al-Shabaab ee la mideysan Shabakada al-Qaacida ayaa sheegtey masuuliyadda weerarkan, waxaana bogga ay ku leeyihiin Twitterka ee ay aalaaba ku sooo gudbiyaan fariimahooda ku sheegeen in ay maanta qaadeen weerar ka dhan ah Xukuumadda Soomaaliya.

Al-shabaab ayaa sheegay in ciidamo boqolaal gaaraya oo dowladda ka tirsan ay ku sugnaayeen Dhismaha hortiisa isla markaana Mujaahidiintooda ay u suurta gashey in la wareegaan dhismahaas kana dagaalamaan muddo 2 saac ah.

Al-Shabaab waxay sheegteen in ay kaga dhimatey weerarkaas 5 ka mid ah Ciidankoda, isla markaana ay dileen 27 kamid ah Dowladda oo ay ku jiraan Saraakiil sar-sare.

Al-Shabaab ayaa sheegaya in weerar cayn kan oo kale ah laga fuliyo Muqdisho iyada oo ay tahay dharaar cad ay calaamad u tahay isla markaana muujineysaa awoodda iyo galaangalka ay ku lee yihiin Muqdisho.

Warbixinta al-Shabaab ka soosaareen weerarkii maanta ayey ku sheegeen in ay tahay fariin ay dirayaan taas oo ah In “Muqdisho aysan ahayn u ahayn Dowladda Janno nabad ah”

Madaxda Dowladda oo ka hadley weerarka

Madaxweynaha Jamhuuriyadda Federaalka ah ee Soomaaliya Xassan Shiikh Maxamuud ayaa isla maanta ku soo laabtey Muqdisho waxaana lagu soo dhaweeyey weerar ka dhacay meel aan waxbadan ka fogeyn hoygiisa, iyada oo xaruntii lagu tilmaamey Garsoorka muddo laba saac ah ay ahayd goob dagaal oo aan fooda la gelin karin, Madaxweynaha oo bayaan ka soo saarey ayaa ku tilmaamey weerarka mid fuleynimo oo oo aan waxba u dhimi karin isla markaana muujinaya jabka kooxda al-Shabaab, ma ahan arrin la yaableh bayaan caynkan oo kale ah in uu soo baxo, waxaana la is weydiinayaa sida aysan waxba uga dhimeyn qof loo digey oo maanta caasimadiisi ahayd goob dagaal.

Raysalwasaare Saacid oo isaguna maanta dib ugu soo laabtey magaalada Muqdisho, ayaa ku koobsadey in uu tacsi u diro dadkii waxyeeladu soo gaartey, waxaana uu ku tilmaamey weerarkan mid aan diinta islaamka ka tarjumeyn.

Xaaladda oo faraha ka baxdey

Xaaladda magaalada Muqdisho ayaa noqotey mid faaha ka baxdey rasaas gees walba laga maqlaayo, dhawaaqa gawaarida gar-gaarka degdega ah iyada oo waddada ugu mashquulka badneyd ee Makka Al-mukaramah ay noqotey waddo ciidanka oo keliya isticmaalaan dhankastana gaari baroon ah u ordaayo. Waxaana dadka qaarkiis dib u xasuusteen dagaaaladii lagu riiqan jirey ee Caasimadda Soomaaliya deriska lahayd laba sano ka hor.

Weerarkii labaad ee isla maanta oo dad Turkish ah ku dhinteen

Iyada oo weli lagu jiro jaahwareerkii ka dhashey weerarkii lagu qaadey Xarunta Maxkamamadda Sare ee Gobolka Banaadir ayaa weerar kale ka dhacay waddada Garoonka Diyaaradaha aada, waxaa qarax lala beegsadey Kolonyo gawaari ah oo ay la socdeen shaqaale u dhashey dalka Turkiga, waxaana ku dhintey labo kamid ah shaqaalihii Turkiga iyo 5 boolis ah, qaraxan faah-faahijn dheeraad ah kama soo bixin weli.

Digniintii Ingriiska

Wasaaradda Arrimaha Dibadda ee Ingriiska ayaa  taariikhdu markey ahayd 5 Abril ka digtey khatar ku soo fool leh magaalada Muqdisho taas oo kooxaha argagixisadu maleegayaan, waxay diigniintu ku socotey dadka u dhashey Britian in ay deg-deg uga soo baxaan Muqdisho maadaama weerarka kooxahaasi ay damacsan yihiin uu joogo heer dhamaad ah.

Dowladda dalkeeda laga digaayo ayaa arintan aad u fududeysey, waxaana ay ku tilmaameen digniihaa caadiga ah ee dalalka qaarkood dadkooda u jeediyaan meelaha khatartu ka jirto.

Markii arrimo caynkan oo kale ah dhacaan waxaa isku casila dadka ka msuulka ahaa  in ay ka hoirtagaan arrimaha caynkan oo kale ah, marka mala gudboontahay taliyaasha sirdoonka dowladda iyo Wasiirka Warfaafintu in ay isku casilaan marka loo eego sida wax u dhaceen.

Si kastaba ha ahaatee waxaa cad in maanta sirdoonkii dowladda iyo laamaha amnigu ay fashilmeen isla markaana xarakada al-Shabaab ay awood ku leedahay magaalada Muqdisho ayna fulin karaan hawlgalo caynkan oo kale ah.