Maraykanka Iyo Ingiriiska Oo Loo Diray Warqad Lagu Difaacay Qadiyada Madax-banaanida, Laguna Sharaxay Kala Duwanaanshaha Somaliland & Somaliya

Hargeysa, February 11, 2013 (Haatuf) – Ururada Madaxabanaan ee Xuquuqda Aadamiga Somaliland ayaa qoraal ay ku difaacayso nabadgalyada iyo Madaxbanaanida Somaliland u diray Xoghayaha Arimaha Dibada Ingiriiska iyo Xoghayaha cusub ee loo Magacaabay Wasaarada Arimaha Dibada Maraykanka.

Qoraalkan oo uu ku saxeexan yahay afhayeenka Horn Of Africa Human Rights Committee Saleebaan Ismaaciil Bulaale (Xuquuq), ayaa qoraalkaasi ku sheegay in Madaxwaynaha Somaliland Md Axmed Maxamed Maxamuud (Siilaanyo) uu yahay ka kali ah ee matala masaaliixda iyo danaha dalka Somaliland, isaga oo sidoo kale Sheegay in Madaxwaynaha dalka dunida ugu liita ee Somalia Xasan Sheekh Maxamuud oo gurigiisa ay ku ilaaliyaan ciidamada AMISON aanu matalin dalka Somaliland iyo shacabkiisa toona.

Qoraalka uu afhayeenku diray Wasiirrada arimaha dibada Maraykanka iyo Ingiriiska oo aanu idiin soo turjunay ayaa u dhignaa sidan "Kaliya Madaxwaynaha la doortay ee Somaliland Md Axmed Maxamed Maxamuud (Siilaanyo) ayaa leh awooda sharciga ah ee ku matalayo masaaliixda iyo danaha dhaqaale, amni difaac, ganacsi iyo siyaasadeed ee Qaranka Somaliland.

Mudane Wasiir, anaga oo ah kuwo hoos ku xusan ee u dhaqdhaqaaqa dimuqraadiyada Somaliland, anaga la shaqeynayna xuquuqal iinsaanka iyo ururrada arimaha bulshada, kana hoos shaqeynayna dallado aan dawli ahayn oo heer qaran ah ayaanu jecelahay inaanu kuu muujino mahad-naqa aanu u hayno dadka iyo dalka boqortooyada Ingiriiska, qaybta libaax ee ay ka qaateen hanaanka horumarinta kaabayaasha waxbarashada, caafimaadka, amniga iyo dimuqraadiyada waddankayaga mudadii 20-ka sano ahayd.

Mudane Wasiir, sidaad ka warqabto hanaanka dimuqraadiyada Somaliland ee sababay in dawlad uu hogaamiyo Madaxwayne la soo doortay, kaasi oo tusaale u noqonaya qawaaniinta dimuqraadiyadeed ee Afrika iyo dunida Muslimka, Madaxwaynaha la soo doortay wuxuu awooday inuu sugo xuduudaha waddanka, xaqiijiyana xoriyada muwaadiniintiisa, sidoo kalena wuxuu awooday inuu qayb laxaadle ka qaato inay Somaliland ka qayb-gasho dedaalada caalamiga ah ee lagu dabar-jarayo budhcad-badeeda iyo aragagixisada ee Geeska Afrika, taana waxa lagu gaadhay taageerada iyo iskaashiga dawladdaha aanu jaarka la nahay ee Jabuuti, Itoobiya iyo Yemen iyo sidoo kalena dawladdo iyo ururro caalami ah.

Tanni saamaynteeda mudane wasiir ururrada bulshadu waxay kugu wargalinaynaa in kaliya in Madaxwaynaha la doortay ee Somaliland Md Axmed Maxamed Maxamuud (Siilaanyo) uu leeyahay awooda sharci ee uu ku matalayo wada xaajoodyada caalamiga ah, anagoo tan eegaynaa waxaanu jecelahay inaanu kugu wargalino in dadka reer Somaliland ay ka soo horjeedaan isku dayada uu Madaxwaynaha aan la dooran ee waddanka aanu jaarka nahay ee Somaliya uu ku doonayo inuu wada xaajoodyo ku matalo dadka reer Somaliland.

Mudane Wasiir, Somaliland inkasta oo aanay ictiraaf caalami ah ka haysan adduunka inay tahay waddan madax-banaanidii uu waddankaagu siiyay 26.06.1960-kii kala soo noqotay kadib midowgii aanu la galay dalka Somaliya 18 May 1991.

Dhanka kale ururrada bulshada Somaliland waxay aad uga murugaysan yihiin xanibaadii socdaaladii caalamiga ahaa iyo daciifintii amniga Somaliland ee ay ku dhawaaqday Wasaaradaadu, taasi oo aanu anagu aaminsanahay inay tahay mid aan waafaqsanayn xaqiiqada, inkasta oo tanni saamayn qaloocda yeelanayso caalami ahaan, haddana dhawaaqaagu wuxuu feejignaan dheeraad galiyey dawladdayada iyo sidii ay u ilaalin lahayd dadka ajaanibka ah, muwaadiniinta iyo ka hor-taggida argagixisada caalamiga ah. Mudane, waxaanu ka codsanaynaa bulshada caalamka, gaar ahaan boqortooyada Ingiriiska inay sii wadaan taageeradii ay siin jireen waddankayaga isla-markaana ay adkayso sharaftii iyo xushmadii aanu u qalanay. Ugu dambayntii, waxaan rabnaa inaanu ku wargalino adduunka in dadka reer Somaliland kalsooni buuxda ku qabbaan Madaxwaynahooda ay doorteen Axmed Maxamed Maxamuud (Siilaanyo) iyo maamulkiisa”