Askar Booliis ah Oo Badhtamaha Laascaanood Ku Dhaawacay Nin Ganacsade Ah iyo Haweenay iyo Wasiirka Ganacsiga Somaliland oo gaadhay

Laascaanood – Koox dablay hubaysan ah ayaa shalay subaxdii badhtamaha Magaalada Laascaanood ee xarunta Gobolka Sool ee Somaliland ku toogtay nin ganacsade ah.

Ninkan ganacsada ah oo ka mid ah ganacsada caanka ah Gobolka Sool, ayaa waxa kooxdani ku wareereen badhtamaha Laascaanood oo marayey, waxayna sida wararku sheegeen ay rasaastu kaga dhacday Madaxa iyo Laabta, inkasta oo aan xaaladiisa caafimaad aan laga dayrinayn.

Ganacsadahan oo Lagu Magacaabo Axmed Cabdi Timir, ayaa sida goob-joogayaal sheegeen in kooxdii weerartay ay markiiba halkaasi ka baxsadeen, iyadda oo markaa ka dib dhaawaca ninkan ganacsadaha la gaadhsiiyay cisbitaala guud ee Magaalada Laascaanood.

Shaqaalaha caafimaadka ee cisbitaalka ayaa Hiiraan Online u sheegay sidan “Xaaladad ganacsadaha waa wanaagsan tahay, xabbadihii madaxa kaga dhacayna uma gudbin maskaxda, waxaana socda baadhitaanno lagu sameynayo rasaastii kaga dhacday laabta” ayay tidhi Roodo Nuur Gadhle oo ka mid ah kaaliyeyaasha cisbitaalka Laascaanood.

Ciidamada booliska Laascaanood ayaa sheegay inay ku daba-jiraan kooxihii falkaas geystey iyadoo askariga ka mid ah ciidamada booliiska uu sheegay in la garanayo haybta ragga dilka geystay.

Weerarkan lagu dhaawacay gancsadaha ayaa u muuqday weerar qorsheysan, iyadda oo weerar habeen hore lagu qaaday gurigiisa lagu dhaawacay xaaska nin ay wallaalo yihiin ganacsadahan.

Dhanka kale, maamulka Gobolka Sool ayaan ilaa hadda ka hadal arintan.

Wefti uu Hogaaminayo Wasiirka Wasaaradda Ganacsiga Somaliland C/risaaq Khaliif ayaa isla xalayba gaadhay magaaladda Laascaanood si ay wax uga qabtaan Xiisad ka dhalatay falka ay Boolisku ku kaceen oo Laascaanood ka abuurtay inay laba Beelood kala saftaan